Уругну интернетте экстремисчи бөлүктерниң элзедикчилеринден канчап камгалаарыл? Сөөлгү чылдарда экстремисчи байдалдыг кем-херек үүлгедиглери көвүдээн. Ону онлайн-пропаганданың салдары-биле назы четпээннер кылып турар. Россияның Истелге комитединиң дыңнадып турары-биле алырга, ындыг таварылгаларның саны чылдан чылче көвүдеп турар. Эң ылаңгыя назы четпээн уруглар кем-херек үүлгедикчилериниң талазындан кыжаныышкынынга база оптуг аргаларынга алзып турары дүвүренчиг. Чүге ындыг байдал тургустунуп турарыл? Элээдилерге бот-бадыткал болгаш амыдыралда бодунуң күжүнге хереглелди шенексээр үези турар. Элзедикчилер колдуунда ону ажыглаар, назы четпээннерге бир дөмей үзелдиг бөлүкте талалакчыларлыг деп сагыш-сеткилди оттуруп, кичээнгейни болгаш деткимчени саналдаар. Ынчалза-даа шынзыдыышкынның аргалары ындыг-ла кем чок эвес: кем-херек үүлгедиишкининче катчып келзин дээш уругну албадаарда, чоок кижилеринге кыжаныр. Уруг-дарыгны айыыл чок болдурар дизе, ада-иелерге элээн каш сүмелер: Ажык чугаадан кылыңар: Уруг силер-биле бодунуң сезиктери, сагыш човаашкыннары-биле үлежир кылдыр бажыңга эп-чөптүг байдалды тургузуңар. Интернет таварыштыр танышпас улузу-биле чугаалажыры кандыг айыылды тургузуп болурун тайылбырлаңар. Шүгүмчүлелдиг боданыышкынга өөредиңер: Уруг-дарыгны меге медээни болгаш чигзинчиг саналдарны шинчилеп билир кылдыр дузалаңар. Медээлерниң үнген дөзүн хынаар, барымдааларны суртаалдардан ылгап билир кылдыр өөредиңер. Четкиде идепкейин хайгаараңар: Социал четкилерде арынын үргүлчү хынап туруңар. Чаа бөлүктерже болгаш харылзааларже кичээнгейни салыңар. Гаджеттерже кирер эргезин хынаңар: Эң ылаңгыя виртуалдыг харылзаалар соонда хөлзээзин им-демдектерин эскерзиңерзе, уругнуң Интернет четкизинче кирер үезин кызыгаарлаңар. Каразынчыг аажы-чаңын кичээнгейге алыңар: Бир эвес уругнуң аажы-чаңында (агрессия, оспаксыргайы) өскерлиишкиннерни эскерип калзыңарза, ооң чылдагаанын ыяап тодарадыңар. Психологтуг деткимче дугайында: Бир эвес херек апарза, тургустунган байдалды сайгарып, үре-түңнелдиг камгалал хемчеглерин саналдаар психолог-специалистерниң сүмезин алыры чугула. Бүзүрел телефонунуң дугаарын сагындырдым: 8-800-2000-122, 124 мобилдиг телефондан база дүрген дуза чедирер албан черлериниң дугаары 112. Уруг-дарыгның айыыл чок чоруу, берге байдалдарда, бир дугаарында, силерниң кичээнгейлиг чорууңардан база деткимче көргүзеринге белениңерден хамааржырын утпаңар!